Dönsk gamalmenni hamingjusömust

Dönsk gamalmenni eru þau hamingjusömustu í heimi. Þetta fullyrðir Kristilega dagblaðið danska og vísar í könnun sem nýlega var framkvæmd í nokkrum löndum til að kanna lífsgæði eldri kynslóðarinnar.

Samkvæmt því sem þar kemur fram er aldurshópurinn 60 - 79 ára í Danmörku sá ánægðasti. Fólk sem er tuttugu árum yngra er hins vegar ekki nærri eins sátt við tilveruna. Eldri hópurinn hefur yfirleitt góða stjórn á fjármálum sínum og nýtur þess að vera á eftirlaunum. Þátttakendur í könnuninni voru spurðir hvernig þeim leið á einnar viku tímabili með vísan til ýmissa þátta.