Krefur Björgólf um tvær milljónir evra vegna vanefnda

Fyrrverandi lögfræðingur hjá Novator, fjárfestingafélagi Björgólfs Thors Björgólfssonar, hefur dregið félagið fyrir dóm í Bretlandi. Lögfræðingurinn, Gunnlaugur Pétur Erlendsson, segir að hann eigi tvær milljónir evra auk vaxta inni hjá Novator vegna aðkomu sinnar að nokkrum stórum samningum sem Novator gerði á undanförnum árum. Ásgeir Friðgeirsson, talsmaður Björgólfsfeðga segir að Novator tjái sig ekki um málið að öðru leyti en því að kröfunum sé alfarið hafnað fyrir rétti.

Greint er frá málinu í breska blaðinu The Daily Mail og sagt að Gunnlaugur hafi komið að samningsgerð þegar Novator keypti 70 prósenta hlut í tékkneska símafyrirtækinu Ceské Radiokomunikace árið 2003 og seldi þremur árum síðar með miklum hagnaði. Gunnlaugur segir að sérfræðiþekking sín hafi skipt sköpum um að margfalda hagnað Novators.

Gunnlaugur segist líka hafa komið að sölunni á Búlgarska símafyrirtækinu sem keypt var fyrir upphæð sem ekki hefur verið gefin upp. Fyrirtækið var síðan selt árið 2007 á 855 milljónir punda. Að auki vill Gunnlaugur fá eitthvað fyrir sinn snúð fyrir aðkomu sína að því þegar Novator keypti í símafyrirtækinu Elisa.

Að sögn Gunnlaugs féllst Björgólfur Thor á að greiða sér 790 þúsund pund fyrir hvert og eitt af þessum þremur verkefnum. Hann hafi hinsvegar aðeins fengið borgað þessa upphæð einu sinni í mars síðastliðnum og því skuldi Novator honum um tvær milljónir evra, auk vaxta.

Nokkuð er um liðið síðan Gunnlaugur var látinn fara frá Novator, en hann er sagður hafa séð um samninga fyrir Novator þegar ákveðið var að taka þátt í framleiðslu á myndinni The Perfect Holiday. Novator fór illa út úr því ævintýri eins og flestir sem að þeirri mynd komu og Vísir hefur áður fjallað um.