Nú fáum við stelpurnar heim!

„Við erum ofboðslega þakklátir og hamingjusamir. Það fyrsta sem kom upp í hugann á okkur var að nú fengjum við stelpurnar heim," segir Guðbergur Garðarsson betur þekktur sem Beggi á Hæðinni. Þeir Beggi og Pacas voru sigurvegarar Hæðarinnar í kvöld og fengu þar 2 milljónir króna í verðlaunarfé.

Það var mikil spenna hjá pörunum á Hæðinni en þáttur kvöldsins var í beinni útsendingu. Pörin þrjú lögðu mikla vinnu í að gera upp íbúðirnar á Hæðinni og þau buðu vinum sínum í þátt kvöldsins.

„Við erum svo þakklátir að ég veit þú trúir því ekki. Þegar við heyrðum að við hefðum unnið komu bara tár," sagði Beggi í samtali við Vísi nú í kvöld og það mátti heyra á honum að spennan var mikil.

„Maður titrar alveg."

Beggi og Pacas voru búnir að lýsa því yfir að ef þeir myndu vinna fengju tvær dætur Pacasar sem búsettar eru í Brasilíu að koma í heimsókn hingað til lands.

„Það er líka svo æðislegt að þær eru úti í Brasilíu að fylgjast með á Vísi. Þær eru búnar að hringja á fullu í allt kvöld og voru alveg jafn stressaðar og við."

Beggi segir að í raun hafi þeim ekki dottið í hug að þeir myndu sigra enda hin pörin tvö með glæsilegar íbúðir. „Við vonuðumst auðvitað til þess og við þökkum innilega fyrir stuðninginn. Takk elsku Íslendingar fyrir að kjósa okkur."