Innlent

Krónan og Sjálfstæðisflokkurinn mest í fréttum ársins

Atli Steinn Guðmundsson skrifar
Geir H. Haarde
Geir H. Haarde

Sá aðili sem oftast hefur verið tilgreindur í fréttum frá áramótum er Sjálfstæðisflokkurinn, eða alls í 6.248 fréttum. Það einstaka málefni sem oftast hefur verið fjallað um í fréttum frá áramótum er íslenska krónan og gengi hennar, eða í alls 5.567 fréttum. Þetta er meðal niðurstaðna fjölmiðlamælingar Creditinfo Ísland sem kynnt var í dag.

Magn innlendra frétta í helstu fjölmiðlum landsins hefur aukist um tæplega þriðjung, Morgunblaðið hefur mestu hlutdeild dagblaða og fréttastofa Stöðvar 2 nær sinni fyrri hlutdeild. Mælingin nær yfir árin 2005 - 2008 og hleypur á sex mánaða samanburðartímabilum.

Kemur fram í mælingunni að aukningin í innlendum fréttum eigi fyrst og fremst rót sína að rekja til aukinnar útgáfu dagblaðaefnis. Til dæmis hafi Viðskiptablaðið fjölgað útgáfudögum sínum úr tveimur í fimm, DV breyst í helgarblað árið 2005 en fjölgað svo aftur útgáfudögum sínum árið eftir auk þess sem 24 stundir hafi aukið efni sitt verulega.

Innlendar fréttir að jafnaði 10.693 á mánuði

Meðaltalsfjöldi innlendra frétta á mánuði það sem af er þessu ári er 10.693 og eru þar jafnt talin blöð sem ljósvakamiðlar. Mælingar Creditinfo Ísland ná enn sem komið er ekki yfir vefmiðla en vonir standa til þess að það breytist, að sögn Rakelar Sveinsdóttur framkvæmdastjóra.

Hlutdeild ljósvakaefnis ár frá ári mælist um 20% en dagblaðaefnis 80%. Fyrstu sex mánuði þessa árs er þetta hlutfall 18% á móti 82%. Morgunblaðið mælist með mestu hlutdeild dagblaða en fer þó heldur minnkandi, 33% á þessu ári miðað við 37 - 40% árin 2005 - 2007.

Fréttablaðið fer úr 32% hlutdeild í fyrra niður í 30% á þessu ári en smærri dagblöðin auka hlutdeild sína jafnt og þétt. Má þar nefna að 24 stundir auka sína hlutdeild úr 12 í 17% og mælist með 11.048 innlendar fréttir það sem af er þessu ári á móti 7.160 á sama tímabili árið 2006 (þá sem Blaðið).

Samkvæmt mælingu Creditinfo hefur hlutdeild stærstu ljósvakafréttastofa ekki tekið jafnmiklum breytingum milli ára utan þess að hlutdeild fréttastofu Stöðvar 2 eykst úr 32% í 37% milli áranna 2007 og 2008. Þá mælist fréttastofa Útvarps enn með mestu hlutdeildina, 40%, sem þó er lækkun úr 44% í fyrra. Enn fremur mælist hún með flestar fréttir á hvern fréttatíma.













Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.