Fram samdi við enskan bakvörð

Fram hefur samið við enska varnarmanninn Sam Tillen sem lék síðast með Brentford í ensku D-deildinni.

Tillen er 22 ára gamall og hefur aðallega spilað sem vinstri bakvörður. Hann hefur þó leyst af í bæði stöðu hægri bakvarðar sem og hægri kantmanns. Tillen er uppalinn hjá Chelsea en gekk til liðs við Brentford árið 2005 er liðið lék í C-deildinni.

Hann býr yfir talsverðri reynslu þrátt fyrir ungan aldur en hann á að baki 83 leiki í öllum keppnum með Brentford á undanförnum þremur árum. Hann skoraði eitt mark í þessum leikjum.

Tillen kom við sögu í tveimur leikjum með Brentford í ágúst en hann lék síðast heilan leik með liðinu í síðasta heimaleik liðsins á síðasta tímabili. Hann fékk svo engin tækifæri með liðinu í haust og þann 10. janúar síðastliðinn var hann leystur undan samningi sínum við Brentford.

„Hann vildi einfaldlega fá að prófa eitthvað nýtt," sagði Ríkharður Daðason, formaður Fram Fótboltafélags. „Hann kom hingað og æfði með liðinu og leist okkur vel á hann. Við höfum einnig átt í vandræðum með örvfætta leikmenn og þurft að nota aðra leikmenn í þá stöðu undanfarin ár. Þorvaldur (Örlyggsson, þjálfari) vill setja saman góða varnarlínu og er þetta hluti af því."

„Sam býr einnig yfir talsverðri reynslu þrátt fyrir ungan aldur og vonumst við til að hann verði sem fyrst mikilvægur hlekkur í okkar liði," bætti Ríkharður við. Tillen kemur til landsins í næstu viku og verður þá alkominn til félagsins.

Aðspurður um leikmannahópinn sagði Ríkharður að hann væri nú vel mannaður og væri félagið ekki með aðra leikmenn í sigtinu. „Við erum þó alltaf að skoða, eins og öll önnur félög."

Annar ungur leikmaður, Heiðar Geir Júlíusson, kom aftur til Fram í haust eftir ársdvöl hjá Hammarby í Svíþjóð. Heiðar hefur undanfarna mánuði æft með liðum til að mynda í Noregi og Belgíu en æfir nú að fullum krafti með Fram.

„Eins og staðan er nú gerum við ráð fyrir því að Heiðar verði með okkur í sumar. Ef það kemur tilboð í hann eða aðra leikmenn munum við skoða það með opnum huga. En það er ljóst að Heiðar bætti sig mikið í Svíþjóð og erum við gríðarlega ánægðir með að hafa fengið hann til okkar á nýjan leik."