Áfrýjunarnefnd lækkar sekt Eimskips um 80 milljónir

Áfrýjunarnefnd samkeppniskeppnismála hefur staðfest þá ákvörðun Samkeppniseftirlitsins að Eimskip hafi misnotað markaðsráðandi stöðu sína á sjóflutningamarkaði og brotið gegn samkeppnislögum. Hins vegar hefur áfrýjunarnefndin minnkað sekt félagsins um 80 milljónir króna, í 230 milljónir.

Fram kemur á vef Samkeppniseftirlitsins að Eimskip hafi brotið gegn samkeppnislögum annars vegar með aðgerðum sem beindust gegn Samskipum með svokallaðri markaðsatlögu og hins vegar með gerð fjölmargra ólögmætra einkakaupasamninga við viðskiptavini sína. Með einkakaupum í þessu samhengi er átt við að samninga þar sem Eimskip skuldbatt viðskiptavini sína til þess að kaupa flutningaþjónustu einungis af félaginu. Var Eimskip sektað um 310 milljónir króna af Samkeppniseftirlitinu.

Eimskip skaut skaut þessu máli til áfrýjunarnefndar samkeppnismála sem kvað upp sinn úrskurð í dag. Fyrir áfrýjunarnefnd hélt Eimskip því fram að málinu hafi ranglega verið beint að félaginu, það væri ekki markaðsráðandi og aðgerðir þess hefðu falið í sér eðlilega samkeppni en ekki brot á samkeppnislögum.

Áfrýjunarnefnd samkeppnismála kemst að þeirri niðurstöðu í úrskurði sínum að Samkeppniseftirlitið hafi réttilega beint málinu að Eimskipum. Jafnframt var staðfest að félagið væri í markaðsráðandi stöðu. Enn fremur staðfesti áfrýjunarnefnd að Eimskip hefði brotið gegn 11. grein samkeppnislaga með aðgerðum sem miðuðu að því að veikja Samskip verulega og varanlega og með gerð ólögmætra einkakaupasamninga.

Telur áfrýjunarnefnd að um hafi verið að ræða alvarleg brot á samkeppnislögum. Taldi áfrýjunarnefnd hæfilegt að leggja 230 milljón króna sekt á Eimskip vegna þessara brota. Er þetta hæsta sekt sem áfrýjunarnefnd samkeppnismála hefur lagt á vegna misnotkunar á markaðsráðandi stöðu.

Fram kemur í tilkynningu frá Eimskip vegna málsins að félagið muni skoða forsendur úrskurðarins á næstu dögum og taka í framhaldi af því ákvörðun um það hvort málinu verður skotið til dómstóla.