Segir hóp á vegum Valgerðar hafa gert aðför að Guðna

Bjarni Harðarson fyrrverandi þingmaður Framsóknarflokksins segir afsögn formannsins vera afar slæm tíðindi fyrir flokkinn. Guðni Ágústsson sagði af sér þingmennsku í dag og lét einnig af störfum sem formaður flokksins. Bjarni vissi af ákvörðun Guðna fyrir um hálfum sólarhring og segist styðja hann heilshugar rétt eins og Guðni gerði í síðustu viku, þegar Bjarni sagði af sér þingmennsku.

Aðspurður um ástæður þess að Guðni lætur af störfum segir Bjarni það snúa að þeim ófriði sem hefur ríkt innan flokksins.

„Það má rekja þetta allt til þess að það hefur verið mjög sérstakt andrúmsloft innan flokksins. Hópur á vegum varaformannsins hefur ítrekað skipulagt aðför að formanninum og gert allt starf ómögulegt," segir Bjarni sem vill ekki fara nánar út í ástæðurnar sem liggja að baki ákvörðun Guðna.

Bjarni hefur átt í útistöðum við Valgerði Sverrisdóttur, varformann flokksins, varðandi stefnu flokksins gagnvart ESB.

Bjarni neitar því að hann ætli að segja sig úr flokknum þar sem Valgerður sé nú orðin formaður.

„Við vitum hver skoðun hennar er á því, en stefna flokksins hefur ekkert breyst."