Heillaði að þjálfa utan Bretlands

Sir Alex Ferguson, knattspyrnustjóri Manchester United, viðurkennir að hafa íhugað að hætta hjá félaginu til að taka að sér stöðu utan Bretlands. Á endanum hafi hinsvegar verið of erfitt að yfirgefa United.

„Ég hef nokkrum sinnum hugsað út í það að kynnast því að stýra erlendu liði. Á endanum hefur ekkert orðið að því, þetta er erfið ákvörðun. Ég er stjóri Manchester United og þú yfirgefur það starf ekki," sagði Sir Alex.

Ferguson hefur stýrt United í 22 ár en aldrei reynt fyrir sér erlendis.

„Bobby Robson sagði að það besta sem hann gerði á sínum ferli var að fara til PSV, Sporting Lissabon, Porto og Barcelona. Hann var erlendis í meira en tíu ár og fékk að kynnast mismunandi menningu og aðstæðum. Það er eitthvað sem allir vilja fá að kynnast," sagði Sir Alex.