Vill ekki gefa upp hverjir keyptu Viðskiptablaðið

Haraldur Johannessen ritstjóri Viðskiptablaðsins vill að svo stöddu ekki gefa upp hverjir það eru sem standa að baki kaupum á Viðskiptablaðinu. Líkt og komið hefur fram í fjölmiðlum var það Útgáfufélagið Myllusetur ehf sem keypti Viðskiptablaðið en skráður eigandi þess er Haraldur.

Haraldur segir í samtali við Vísi í kvöld að ekki sé komið að því að gefa upp hverjir standi að baki kaupunum með sér en það verði gert síðar. „Ég læt vita strax og ég get."

Fram hefur komið í fjölmiðlum að nýir eigendur Viðskiptablaðsins hyggist gefa það út sem vikublað. Fiskifréttir munu einnig halda áfram að koma út auk þess sem netmiðlarnir vb.is og skip.is verða einnig starfræktir.