Ís­lands­banki spáir 0,25 prósent hækkun stýrivaxta

Sérfræðingar bankans segja stýrivextina líklega munu haldast óbreytta eftir það fram undir næsta vor, þegar þeir muni byrja að lækka.

Gangi spá Íslandsbanka eftir verði vextir á sjö daga bundnum innlánum átta prósent.

„Þrálát verðbólga, of háar verðbólguvæntingar og aukin óvissa um launaþróun á næstu misserum vegna endurskoðunarákvæðis í kjarasamningum munu þar vega þyngra en skýr merki um kólnandi vinnumarkað, betra jafnvægi á íbúðamarkaði og vaxandi slaka í hagkerfinu. Þar skiptir líka máli að miðlun þessara þátta yfir í hjaðnandi verðbólgu og lækkandi verðbólguvæntingar virðist vera tregari en vonast var til,“ segir í tilkynningu á vef Íslandsbanka.

Sérfræðingar Íslandsbanka segja raunar líklegra að peningastefnunefndin velti fyrir sér að hækka vextina enn frekar en að til greina komi að halda vöxtum óbreyttum.

„Ákvörðun um óbreytta vexti nú eftir samfellda verðbólgu yfir 5% allt frá áramótum, útlit fyrir svipaða verðbólgu út þetta ár og viðvarandi háar verðbólguvæntingar væri einfaldlega ekki heppileg fyrir trúverðugleika verðbólgumarkmiðsins.“

Samkvæmt greiningu Íslandsbanka virðist hagvöxtur áfram verða hægur á árinu, enda hafi háir raunvextir, áframhaldandi aðlögun á vinnumarkaði og tímabundið bakslag í nokkrum útflutningsgreinum haldið aftur af umsvifum. Á móti vegi að staða heimila og fyrirtækja sé yfirleitt traust, kaupmáttur launa hafi almennt þokast upp á við þrátt fyrir mikla verðbólgu, einkaneysla reynst seigari en ætla mátti og vísbendingar uppi um að útflutningshorfur hafi almennt fremur skánað en versnað.

„Í grunnsviðsmynd okkar er því enn gert ráð fyrir að hagkerfið sigli í gegnum komandi fjórðunga án þess að skreppa saman, þó ljóst sé að lítið megi út af bera svo hægur vöxtur snúist ekki í tímabundinn samdrátt.

Slaki hefur hins vegar aukist jafnt og þétt í þjóðarbúinu. Atvinnuleysi hefur vaxið frá lægstu gildum síðustu ára, hægt hefur verulega á fólksflutningum til landsins og skortur á starfsfólki er mun minni en áður. Á húsnæðismarkaði hefur verðþróun róast, framboð aukist og áhrif hárrar vaxtabyrði orðið sýnilegri. Þessi þróun bendir til þess að innlendur verðbólguþrýstingur muni halda áfram að gefa eftir þegar líður á árið, þótt sú aðlögun hafi reynst hægari en vonir stóðu til fyrr á árinu.“