Steinar Arason: Það er hlutverk mitt að taka þessi skot

Það var ekki síst fyrir óvæntan stórleik Steinars Arasonar að ÍR náði að stela sigrinum á KR á útivelli í kvöld, en hann skoraði 20 stig í leiknum og nýtti 5 af 7 þriggja stiga skotum sínum.

"Sjálfstraustið var alveg í botni í kvöld og það gekk allt upp hjá mér. Það er hlutverk mitt í liðinu að taka þessi skot og þau voru að detta hjá mér núna. Ég er góður í þessu og þegar maður setur þetta svona niður, heldur maður bara áfram að skjóta," sagði hetja ÍR-inga, sem reiknar með erfiðum öðrum leik á laugardaginn.

"KR-ingarnir koma auðvitað dýrvitlausir í leikinn á laugardaginn. Þeir eru með hörkulið og hafa verið að vinna á útivelli í allan vetur. Við erum líka með frábært lið og ef við mætum einbeittir til leiks munum við vinna þá," sagði Steinar í samtali við Arnar Björnsson eftir leikinn.

Steinar skoraði aðeins 5,3 stig að meðaltali í leik með ÍR í deildarkeppninni og var aðeins einum þrist frá persónulegu meti sínu á ferlinum.