Hlynur Smári hlaut þriggja ára fangelsi

„Hann hlaut stysta dóm sem hægt er að fá fyrir svona brot þarna, þriggja ára fangelsisdóm,“ segir Pétur Ásgeirsson, skrifstofustjóri í utanríkisráðuneytinu, varðandi dómsuppsögu yfir Hlyni Smára Sigurðarsyni.

Hlynur Smári var handtekinn í byrjun júní í fyrra með rúmlega tvö kíló af ætluðu kókaíni í fórum sínum. Hann hafði því setið í gæsluvarðhaldi í níu og hálfan mánuð áður en dómur féll loks yfir honum.

Að sögn Péturs er hámarksrefsing fyrir brot af þessu tagi í Brasilíu tólf til fimmtán ára fangelsi. Spurður hvort ráðuneytið muni beita sér fyrir því að fá Hlyn Smára fluttan heim til afplánunar segir Pétur að fyrst verði að berast beiðni þess efnis til dómsmálaráðuneytisins frá fanganum sjálfum, en framsal milli landa er á könnu þess ráðuneytis.

Sigurður Þorvaldsson, faðir Hlyns Smára, var feginn að loks væri komin niðurstaða í málið. „Það dregst auðvitað frá sá tími sem hann hefur setið í gæsluvarðhaldi og mér skilst að hann þurfi ekki að sitja af sér nema hluta dómsins. Það gæti því farið að styttast í hann þannig að kærkomnir endurfundir blasa vonandi við. Þessi bið hefur verið mér og öðrum aðstandendum hans mjög erfið.“

Sigurður segist vera mjög ánægður með vinnubrögð utanríkisráðuneytisins og ræðismanns Íslands í Brasilíu í þessu máli. „Miklar og góðar þakkir frá mér til Katrínar Einarsdóttur í utanríkisráðuneytinu. Hún hefur staðið sig frábærlega í þessu öllu saman.“

Hlynur Smári, sem er 24 ára gamall, var sem fyrr segir handtekinn í Brasilíu síðastliðið sumar með tvær pakkningar af ætluðum fíkniefnum í fórum sínum. Í annarri voru 100 grömm af kókaíni en í hinni um tvö kíló af efni sem reyndist við efnagreiningu vera barnapúður.

Síðastliðið haust sagði Hlynur Smári Fréttablaðinu frá þeim ómannúðlegu aðstæðum sem voru í fangelsinu sem hann hefur dvalist lengstum í. Þá lýsti hann því hvernig samfangi hans hefði reynt að drepa hann fyrir sígarettu og sagðist ganga með tálgaðan tannbursta á sér ef ske kynni að einhver réðist á hann á ný. Hann deildi þar tveggja manna klefa með tíu öðrum föngum og fékk ekkert nema myglað brauð og ormafullt vatn sér til næringar. Þá var hann þess fullviss að lyfjum sem halda niðri kynhvötinni væri blandað út í kaffi og mat fanganna svo þeir myndu ekki nauðga hver öðrum.