Fyrsta stórmyndin á ís

Fyrsta Hollywood stórmyndin hefur verið sett á ís vegna verkfalls handritshöfunda. Tökum á framhaldinu af Da Vinci lyklinum hefur verið frestað.

Myndin byggir á Englum og djöflum, fyrstu bók Dan Browns um ævintýraprófessorin Robert Langdon. Tom Hanks átti að fara með hlutverk hans eins og í fyrri myndinni og Ron Howard að leikstýra. Framleiðendur myndarinnar segja að þeir verði að stöðva vinnu við hana nú þar sem nokkuð skortir á að handrit hennar sé fullklárað. Myndina átta að frumsýna seint á næsta ári. Frumsýningunni hefur nú verið frestað til 2009 - ekki er gefið upp hvenær ársins.

Verkfallið skall á fyrir hálfum mánuði. Næsti samningafundur deilenda er fyrirhugaður eftir tæpa viku. Óttast margir að verkfallið eigi enn eftir að dragast á langinn - tefja framleiðslu á mörgum stórmyndum til viðbótar og binda enda á nýjustu syrpur vinsælla sjónvarpþátta strax um áramótin. Síðasta verkfall handritshöfunda 1988 stóð í 22 vikur og varð banabiti margra vinsælla sjónvarpsþátta á borð við Moonlighting og Hill Street Blues.

En það eru ekki bara verkfall í Hollywood. Sviðsmenn á Broadway í New York lögðu niður vinnu fyrir viku og hvorki gengur né rekur í samningaviðræðum deilenda. Upp úr slitnaði í gærkvöldi. Talsmaður sviðsmanna segir síðasta tilboð framleiðenda ekki hafa verið nægilega gott. Talsmaður framleiðenda segir á móti að sviðsmenn hafi hafnað sáttaleið.

Það sem einkum skilur á milli í deilunni eru óskir framleiðenda um að fá að ráða aukafólk í miklum mæli þegar verið er að setja upp leiksviðin fyrir frumsýningar. Auk þess er mikill ágreiningur um vinnutíma og bónusa.

Verkfallið er farið að hafa veruleg áhrif utan Brodway og merkja eigendur veitingahúsa og hótela minnkandi aðsókn þar sem engar leiksýnignar eru í gangi. New York Daily Times hefur þannig eftir þjóni á vinsælum veitingastað að hann hafi tapað sem nemur jafnvirði tæplega 50 þúsund króna í þjórfé síðan að verkfallið hófst.