Landsbankinn í samstarf við Alþjóðahúsið

Alþjóðahúsið og Landsbankinn hafa gert með sér samning sem meðal annars felur í sér að bankinn styrkir húsið um tíu milljónir á þessu ári. Eftir því sem segir í tilkynningu frá bankanum og Alþjóðahúsinu hyggst bankinn einnig bjóða viðskiptavinum sínum sem eru af erlendu bergi brotnir upp á íslensku- og fjármálakennslu í samstarfi við Alþjóðahúsið.

Þá hyggst Landsbankinn fá sérfræðinga Alþjóðahússins í lið með sér til að undirbúa og flytja fyrirlestra fyrir starfsmenn Landsbankans um þjónustu í fjölmenningarumhverfi.

Enn fremur verður Landsbankinn bakhjarl viðurkenningar Alþjóðahússins til þeirra sem hafa sinnt lofsverðu starfi í málefnum innflytjenda. Viðurkenningin hefur verið veitt síðasta virka dag desembermánaðar nokkur undanliðin ár en frá og með desember 2007 verður viðurkenningin kennd við Thor Jensen og Landsbankinn bakhjarl hennar.