Einar Árni: Það verður erfitt að fara í vesturbæinn

"Það var sárt að tapa þessum leik, ég verð bara að segja það, en ég hef trú á því að mínir menn mæti enn grimmari í næsta leik. Ballið er rétt að byrja og við erum búnir að tapa núna tveimur leikjum þar sem við vorum í góðri stöðu og við verðum greinilega að fara að klára þessa leiki betur" sagði Einar Árni Jóhannsson, þjálfari Njarðvíkur.

"Vandamálið er það að við vorum ekki að ná að stoppa þá - þeir voru að setja niður stór skot og það eru gríðarleg vonbrigði að fá á sig 96 stig á heimavelli. Það verður alltaf erfitt að fara í vesturbæinn og ná sigri. Við ætluðum alltaf að fara þangað til að ná í meistaratitilinn en nú verðum við að fara þangað til að ná okkur í annan leik og koma aftur hingað," sagði Einar Árni í samtali við Sýn eftir leikinn í dag.