Þjóðverjar heimsmeistarar í handbolta

Þjóðverjar eru heimsmeistarar í handbolta eftir 29-24 sigur á Pólverjum í úrslitaleik í Köln í dag. Þjóðverjar höfðu yfir í hálfleik 17-13 og höfðu yfirhöndina allan leikinn. Pólverjar náðu góðum leikkafla um miðjan síðari hálfleik og náðu að minnka muninn í 22-21 en þá tóku heimamenn mikla rispu og tryggðu sér verðskuldaðan sigur.

Þetta var þriðji heimsmeistaratitill Þjóðverja í handbolta, en liðið varð síðast heimsmeistari árið 1978 og þá var núverandi þjálfari liðsins Heiner Brand fyrirliði liðsins.

Torsten Jansen var markahæstur í liði Þjóðverja í dag með 8 mörk og Pascal Hens skoraði 6 mörk. Grzegorz Tkaczyk og Mariusz Jurasik skoruðu 5 hvor fyrir Pólverja, sem eru í raun lið mótsins þrátt fyrir tap í úrslitaleiknum.