Fjór­tán marka stór­sigur í fyrsta leik

Talsverðar væntingar eru gerðar til íslenska liðsins en uppistaða þess er gríðarlega öflugur 2008-árgangur sem hefur náð góðum árangri á undanförnum árum.

Íslendingar gáfu Svartfellingum engin grið í leik dagsins. Ísland leiddi allan tímann og vann að lokum fjórtán marka sigur, 39-25.

Eftir að Svartfjallaland jafnaði metin í 7-7 kom frábær kafli hjá Íslandi sem skoraði sjö mörk í röð og komst í 14-7. Níu mörkum munaði svo á liðunum í hálfleik, 19-10.

Því forskoti ógnuðu Svartfellingar aldrei. Þeir minnkuðu muninn í 26-20 eftir 3-1 kafla en þá stigu Íslendingar aftur á bensíngjöfina, skoruðu þrjú mörk í röð, endurheimtu níu marka forskotið sem þeir höfðu í hálfleik og juku svo forskotið á lokakaflanum.

Freyr Aronsson skoraði tíu mörk fyrir íslenska liðið. Alex Unnar Hallgrímsson var með sjö mörk og Logi Finnsson sex. Tíu leikmenn Íslands komust á blað í leiknum.

Auk Íslands og Svartfjallalands eru Ungverjaland og Sviss í D-riðli Evrópumótsins. Næsti leikur Íslendinga er gegn Ungverjum á morgun.