Bandaríkin að veita Líbanon lán

Bandaríkin hétu því í dag að veita Líbanon 770 milljón dollara lán, eða um 53 milljarða íslenskra króna, til þess að styrkja við stjórn Foud Siniora í baráttu hans við stjórnarandstöðu Hezbollah. Þetta staðfesti talsmaður Bandaríkjastjórnar í dag.

„Forsetinn mun biðja þingið um 770 milljónir dollara til þess að styðja við stjórnvöld í Líbanon." sagði Condoleezza Rice, utanríkisráðherra Bandaríkjanna, við fréttamenn í dag áður en hún flaug til Parísar á fund með alþjóðlegum lánadrottnum sem ætla sér að safna milljörðum fyrir Líbanon.

Peningum á einnig að verja í uppbyggingu í Líbanon en svæðið er enn í rústum eftir stríðið milli Ísraels og Líbanon í fyrra.