Tapið fyrir Íslandi eins og köld sturta

Franskir miðlar fara hörðum orðum um frammistöðu Frakka í landsleiknum gegn Íslendingum á heimsmeistaramótinu í handknattleik í gær. Þar segir að fall Evrópumeistaranna hafi verið hátt enda tapaði liðið með átta mörkum fyrir Íslandi. Frakkarnir hafi einfaldlega verið of sigurvissir eftir stórsigra á Áströlum og Úkraínumönnum.



Vefmiðillinn Sport birtir umsögn undir fyrirsögninni „Kaldur skellur fyrir þá bláklæddu". Þar segir að segir að öflugt íslenskt landslið hafi yfirspilað það franska og því fari það síðarnefnda í milliriðla án stiga. „Héldu þeir að þetta yrði auðvelt?" spyr greinarhöfundur og minnir á að Íslendingar hafi verið að spila fyrir áframhaldandi þátttöku sinni í keppninni. Greinarhöfundur segir markmenn liðsins hafa verið fjarverandi og sóknarleikinn óþekkjanlegan.



Haft er eftir Claude Onesta, þjálfara franska liðsins, í franska stórblaðinu Le Monde að bjartsýninin í liðinu sé hreinlega of mikil. „Þegar ég reyndi að segja þeim að þeir væru ekki heimsmeistarar hafði ég á tilfinningunni að ég væri að hrópa í eyðimörkinni," sagði Onesta eftir leikinn.



Í franska íþróttablaðinu L´Equipe er svo haft eftir Jerome Fernandez, stórskyttu franska liðsins, að liðið hafi byrjað hörmulega í leiknum, bæði í vörn og sókn og hafi verið í stanslausum eltingarleik vegna þess það sem eftir var leiksins. „Við reyndum að nýta hæfileika okkar sem einstaklingar en það gekk ekki í dag. Við lærðum dýrmæta lexíu á þessu," sagði Fernandez, en blaðið sagði tap Frakka hafa verið eins og kalda sturtu frá 'Islendingum.