Jafnt á með okkur Óla Stefáns

Markvörðurinn magnaði Kasper Hvidt hjá danska landsliðinu og Portland San Antonio á Spáni, segir að einvíg hans og Ólafs Stefánssonar hafi verið nokkuð jöfn í spænsku deildinni undanfarin ár. Hann segir að Ólafur sé klókur leikmaður.

"Ég myndi segja að þetta væri svona 50/50. Stundum næ ég að sjá við honum, en stundum skýtur hann mig líka í kaf. Hann er rosalega klókur leikmaður, en hann er ekki sá eini sem við þurfum að hafa áhyggjur af. Síðast þegar við mættum íslenska liðinu var það leikstjórnandinn þeirra (Snorri Steinn Guðjónsson) sem fór illa með okkur og því verðum við að kortleggja lið þeirra vel fyrir leikinn í kvöld," sagði Hvidt í samtali við TV2 í Danmörku.