Á 159 kílómetra hraða í Hörgárdal

Lögreglan á Akureyri stöðvaði ökumann á þjóðveginum við bæinn Vindheima í Hörgárdal um sexleytið í morgun eftir að hann hafði mælst á 159 kílómetra hraða á klukkustund. Maðurinn var fluttur á lögreglustöð þar sem verið er að fara yfir hvort svipta eigi hann ökuleyfi til bráðabirgða.

Samkvæmt sektarákvæðum laga getur maðurinn átt von á 140 þúsund króna sekt og tveggja mánaða ökuleyfissviptingu fyrir ofsaaksturinn. Umferðarslys varð í gær á þeim stað þar sem maðurinn var tekinn en þar voru tvær konur fluttar á sjúkrahús eftir að bílar sem komu hvor úr sinni áttinni skullu saman við Vindheima.