Geir Ólafsson segir í samtali við Vísi.is að það sé rangt að hann hafi falsað bréf frá forsætisráðherra Geir H. Haarde líkt og fram kemur á forsíðu DV í dag. Bréfið átti samkvæmt DV að vera til þess fallið að lokka Nancy Sinatra til landsins.
Aðspurður segist Geir kannast við bréfið en að það hafi verið án undirskriftar forsætisráðherrans og því hafi hann ekki sent það.
Geir segir annars að það gangi vel að fá Nancy til landsins. Hann sendi samning út til undirritunar á föstudag og vonast til að söngkonan syngi með honum á tónleikum hér á landi 6. október næstkomandi.
