Kartöflubændur horfa fram á 200 milljón kr. tap

Kartöflubændur landsins telja að uppskera þeirra í ár vegna þurrkanna fyrr í sumar og næturfrosta nú muni verða allt að helmingi minni en í meðalári. Magnús Ágústsson garðyrkjuráðunautur hjá Bændasamtökunum segir að þetta geti þýtt í kringum 200 milljón kr. tap í þessari búgrein.

"Og þess ber að geta að helmingi minni uppskera þýðir ekki minni vinnu við hana því bændurnir þurfa að fara yfir alla akra sína og taka upp," segir Magnús. "Vinna við pökkun og sölu verður þó eitthvað minni."

Magnús segir að lítil uppskera í ár sé ekki eingöngu næturfrostum að kenna. "Þurrkarnir fyrr í sumar höfðu sitt að segja um litla sprettu," segir Magnús. "Það var því sérlega slæmt að fá næturfrostin svona snemma í ár en venjulega koma þau ekki fyrr en um 12. september."

Magnús segir ennfremur að bændur séu ekki vel í stakk búnir til að mæta þessu áfalli því fyrir séu þeir að glíma við lágt verð á afurð sinni.

Magnús segir að góðu fréttirnar í þessari stöðu séu þær að eftir næturfrost fari kartöflurnar að þróa hýði sitt hraðar og því muni kartöflurnar í ár líta fallega út langt fram eftir vetri.