Breskir Grænir harma "ofsóknir" stjórnvalda

Græni flokkurinn í Bretlandi harmar það sem hann kallar "pólitískar ofsóknir" íslenskra stjórnvalda í garð samtakanna Saving Iceland. Dr. Derek Wall talsmaður flokksins segir á heimasíðunni Greenparty.org að flokkurinn styðji baráttu Miriam Rose og harmi það að vísa eigi henni úr landi. "Það er nauðsynlegt að við styðjum réttinn til friðsælla mótmæla," segir Wall.

Fram kemur í máli Wall að Grænir í Bretlandi styðji hugmyndir Vinstri-Grænna hér í að fá óháða rannsókn á framkomu lögreglunnar í garð mótmælenda á vegum Saving Iceland hér á landi árin 2005 og 2006. "Og mig hryllir við það sem lítur út fyrir að vera kerfisbundin ofsókn á hendur Miriam Rose sem pólitískum umhverfissinna," segir Wall.