Dýru verði keypt athygli í Skaupinu

Sú ákvörðun Ríkissjónvarpsins að bjóða upp á auglýsingatíma í Áramótaskaupinu hefur tæpast farið fram hjá mörgum. Fyrir skömmu kom það fram að tilboða yrði leitað í mínútulangt auglýsingapláss í miðju Skaupinu, og að ekki kæmi til greina að selja það fyrir minna en þrjár milljónir. Í gær var svo tilkynnt að plássið væri selt, og herma sögusagnir að fasteignasalan Remax hafi hreppt hnossið. Skiptar skoðanir eru hinsvegar um það hvort ráðlegt sé að auglýsa í miðju vinsælasta sjónvarpsþáttar landsins.

„Ef auglýsandinn þarf ekki að koma einhverjum bráðnauðsynlegum skilaboðum á framfæri við alla þjóðina, og þar að auki á örskömmum tíma, hefði ég haldið að þetta væri ekki góður bisness,“ sagði Gunnar Steinn Pálsson ráðgjafi í almannatengslum, þegar Vísir leitaði álits hans á málinu.

„Þetta er býsna dýru verði keypt athygli í tvennum skilningi. Í fyrsta lagi er sekúndan afar dýr svo ekki sé meira sagt í samhengi við 300 þúsund manna samfélag. Í öðru lagi er viðbúið að innskot af þessu tagi fari talsvert í taugarnar á fólki. Auglýsingin þarf a.m.k. að vera bæði áhugaverð og vel gerð til þess að henni verði fyrirgefið að rjúfa þessa hátíðardagskrá sem safnar þorra þjóðarinnar saman í sófana á miðju gamlárskvöldi.“

Gunnar segir að vel gerð mínútulöng sjónvarpsauglýsing sé ekki búin til fyrir minna en 5-10 milljónir króna og það þyki almennt ekki góð latína að framleiða auglýsingu sem ekki er hægt að birta fyrir talsvert hærri upphæð en nemur framleiðslukostnaði. Þess vegna yrði svona sérframleidd sjónvarpsauglýsing að birtast talsvert oftar til þess að réttlæta sjálfa sig.

„Það þarf nú oft tvo til að svona lagað geti orðið að veruleika,“ segir Gunnar, sem finnst það vanráðið hjá RÚV að bjóða auglýsingaplássið til sölu.

„Ríkissjónvarpið er að mínu viti á villigötum þegar þeir ætla sér að skafa inn auka þrjár milljónir á auglýsingu í áramótaskaupinu. Enn einu sinni finnst manni þeir teygja sig fulllangt miðað við þann grundvöll sem reksturinn byggir á.“

„Við erum ekki það milljónasamfélag sem til þarf til þess að til að mínútuverð af þessu tagi sé réttlætanlegt,“ segir Gunnar.

„Persónulega finnst mér þetta vera hluti af þessari yfirkeyrðu veislu sem við erum öll búin að sitja í undanfarin ár. Þessari veislu er lokið í bili og ég held að þetta verði áreiðanlega með síðustu eftirréttunum sem koma í því partýi.“