Afrakstur ungra frumkvöðla

Ungir frumkvöðlar á Íslandi standa í dag og á morgun fyrir Vörumessu í Smáralind. Þar kynna framhaldsskólanemar fyrirtæki sem þeir hafa stofnað. Um 240 nemendur tóku þátt í verkefninu og átján fyrirtæki verða kynnt.

Ungir frumkvöðlar eru frjáls félagasamtök og hluti af alþjóðlegu samtökunum Junior Achievement Worldwide. Í vetur hafa samtökin staðið fyrir námskeiðinu Fyrirtækjasmiðjan og verður afrakstur vetrarins kynntur í dag og á morgun. Á námskeiðinu lærðu nemendur að reka og stofna fyrirtæki með öllu sem því fylgir.

Kolbeinn Karl Kristinsson er forstjóri fyrirtækisins Allt í einu, sem er eitt hinna nýju frumkvöðlafyrirtækja sem kynnt eru í Smáralindinni. Nemendur í Fjölbrautaskóla Suðurlands standa á bak við fyrirtækið og alls hafa tólf nemendur tekið þátt í verkefninu. „Við höfum sett á markað matarbakka með beyglu, ávöxtum og grænmeti,“ segir Kolbeinn og bætir því við að markmiðið hafi verið að koma fram með hollan skyndibita sem auðvelt væri að grípa með sér. „Við erum í samstarfi við Línu matvæli, sem sér um framleiðslu og dreifingu fyrir okkur,“ segir Kolbeinn og bætir því við að stefnt sé að því að matarbakkarnir fáist á öllum útsölustöðum Línu samloka.

Kolbeinn er ánægður með verkefnið og segir það hafa verið góða reynslu að taka þátt í því. „Við fórum eiginlega af stað með tvö verkefni. Við byrjuðum á því að framleiða boli í tengslum við Flóafár, sem er skemmtun hér í skólanum. Með auglýsingasölu gátum við safnað í svolítinn sjóð og gátum því startað matarbakkahugmyndinni án þess að taka lán. Okkur langaði að sýna fram á að það er hægt að stofna fyrirtæki án þess að byrja á því að taka lán,“ segir Kolbeinn.

„Þetta hefur verið rosalega skemmtilegt verkefni og það verður gaman að sjá afraksturinn á vörumessunni,“ segir Herdís Helga Arnalds, nemandi í Verslunarskóla Íslands, en hún tók þátt í verkefninu ásamt öðrum nemendum á hagfræðibraut.

„Við erum átta saman í hópi og við ákváðum að setja upp heimasíðu. Síðan heitir www.hvert.is og þar er hægt að finna upplýsingar um ýmsa þjónustu,“ segir Herdís og bætir því við að þeim hafi þótt vanta einn stað með upplýsingum sem þessum.

„Við erum í samstarfi við Kópavogsbæ og unnum verkefnið út frá því. Á síðunni er því hægt að finna upplýsingar um þjónustu í Kópavogi og hvar allt er. Þú ferð inn á síðuna og smelltir kannski á tengilinn „afþreying og skemmtun“ og þar getur þú séð hvar öll kvikmyndahús og myndbandaleigur eru. Síðan verður þó ekki tekin formlega í notkun strax,“ útskýrir Herdís. Hún segir að síðan geti því flýtt fyrir fólki sem annars hefði þurft að fara inn á margar heimasíður til að finna þessar upplýsingar.

Herdís segir að verkefnið hafi gengið vel og samstarfið innan hópsins hafi verið gott. „Auðvitað hefur farið mikil vinna í þetta en það hefur verið þess virði því þetta er mjög lærdómsríkt og það er gaman að fylgjast með verkefninu verða að veruleika,“ segir Herdís, sem ætlar að kynna heimasíðuna í Smáralind ásamt félögum sínum.