Bandaríkjamenn sigruðu í Ameríkukeppninni

Landslið Bandaríkjanna tryggði sér í nótt auðveldan sigur í Ameríkukeppninni í körfubolta með því að kjöldraga Argentínumenn 118-81 í úrslitaleik mótsins. Úrslitaleikurinn hafði í sjálfu sér litla þýðingu þar sem bæði lið höfðu þegar tryggt sér sæti á Ólympíuleikunum í Peking á næsta ári.

Lið Argentínu var án fjögurra af sínum bestu mönnum í keppninni og þar á meðal hinum magnaða Manu Ginobili hjá San Antonio Spurs. Það kom því nokkuð á óvart þegar liðið náði að tryggja sér sæti á Ólympíuleikunum með því að ná í úrslitaleikinn í Ameríkukeppninni. Mótið fór fram í Las Vegas í Bandaríkjunum og skoruðu heimamenn að meðaltali tæp 117 stig í leik og var aldrei ógnað í 10 leikjum sínum á 12 dögum.

Argentínumennirnir sáu þó aldrei til sólar í úrslitaleiknum sem var eign Bandaríkjamanna frá fyrstu mínútu. LeBron James skoraði 31 stig fyrir Bandaríkjamenn í leiknum og er það hæsta stigaskor í sögu liðsins í leik í undankeppni. Miðherjinn Dwight Howard hjá Orlando Magic skoraði 20 stig fyrir heimamenn og hitti öllum sjö skotum sínum. Carmelo Anthony hjá Denver Nuggets skoraði 16 stig.

"Við erum orðnir hundleiðir á bronsverðlaunum," sagði Carmelo Anthony, sem líkt og LeBron James hafði aldrei unnið til gullverðlauna á stórmóti með landsliðinu. "Ég er orðlaus núna - þetta eru fyrstu gullverðlaunin mín."

LeBron James var líka sáttur við sigurinn. "Ég sá það hérna að mennirnir í þessu liði gátu sett egóið sitt og einstaklingsafrek sín á hilluna og spilað sem lið. Allir vorum við með sameiginlegt takmark og það var að vinna gull," sagði James - sem var með ótrúlega tölfræði á mótinu. Hann var með 76% skotnýtingu utan af velli og nýtti 8 af 11 þriggja stiga skotum sínum á mótinu, sem er met.

"Það er frábært að fylgjast með þessu bandaríska liði spila og ég held að það sé eitt það besta sem þeir hafa teflt fram til þessa. Upprunalega draumaliðið með Jordan, Magic og Bird var auðvitað stórkostlegt, en þessir spila gríðarlega vel saman og spila sterka vörn. Það er frábært að spila á móti þeim," sagði Sergio Hernandez, landsliðsþjálfari Argentínu.

Argentínumenn voru án NBA leikmannanna Manu Ginobili, Fabricio Oberto, Andres Nocioni og Walter Herrmann á mótinu, en náðu samt að tryggja sér sæti á Ólympíuleikunum á næsta ári. Púertó Ríkó lagði svo Brasilíu 111-107 í leiknum um þriðja sætið á mótinu í gærkvöld.