Nýtt afl á íslenskum fjármálamarkaði

Eggert Þór Aðalsteinsson

skrifar

Saga Capital Fjárfestingarbanki er nýjasta aflið á íslenskum fjármálamarkaði en eigið fé hins nýja banka er um 9,5 milljarðar króna. Forsvarsmenn bankans reikna með að Fjármálaeftirlitið veiti honum starfsleyfi á næstu dögum. „Það hefur ekki gerst frá stofnun Íslandsbanka árið 1904 að banki sé stofnaður frá fyrsta degi, heldur hefur almennt verið um útvíkkun fyrri starfsemi að ræða,“ segir Þorvaldur Lúðvík Sigurjónsson, forstjóri Saga Capital. Stefnt er að því að félagið fari á hlutabréfamarkað innan fjögurra ára.

Saga Capital er heildsölubanki fyrir stofnanafjárfesta og fyrirtæki. Eignarhald í bankanum dreifist á breiðan hóp fjörutíu hluthafa. Þorvaldur Lúðvík, sem var áður yfir eigin viðskiptum Kaupþings, er stærsti hluthafinn með þrettán prósenta hlut en aðrir eigendur eru öflugir fjárfestar úr íslensku viðskiptalífi, KEA, ýmsir sparisjóðir og starfsmenn. „Stefnan okkar er að enginn sé yfirgnæfandi, sem þýðir að enginn sé ómissandi. Það eru því fjölbreyttir hagsmunir sem endurspeglast í eigendahópi okkar og í þann hóp er gott að sækja bæði reynslu og þekkingu.“

Höfuðstöðvar bankans eru á Akureyri en jafnframt verður starfsstöð í Reykjavík. Starfsmenn verða á bilinu 20-25 og koma lykilstarfsmenn úr ýmsum áttum úr íslensku fjármálalífi. Þeir eiga það sammerkt að búa yfir mikilli þekkingu á innlendum og alþjóðlegum fjármálamörkuðum. „Ætlunin er ekki að finna upp hjólið aftur heldur að fólk komi hingað inn og byrji að búa til tekjur frá fyrsta degi.“

Þorvaldur segir að Saga Capital eigi að fá að vaxa og dafna á afmörkuðum sviðum. Nýi bankinn starfar á fjórum sviðum: stöðutöku, útlánasviði, verðbréfamiðlun og fyrirtækjaráðgjöf. Stöðutakan mun skiptast í hefðbundna stöðutöku í öllum afurðum, auk viðskiptavakta.

Útlán snúa að hefðbundinni verkefna- og verðbréfafjármögnun, sem og að leita að bestu fjármögnun fyrir þau fyrirtæki sem leita til bankans, óháð uppruna lánanna. Hvað varðar verðbréfamiðlun segir Þorvaldur að horft verði til stofnanafjárfesta og ætlar Saga að bjóða upp á viðskiptakostnað sem verður með því besta sem gerist á markaðnum, auk þess að bjóða upp á beinan markaðsgang á Ísland og alþjóðamarkaði fyrir viðskiptavini.

Í fyrirtækjaráðgjöf er áherslan skýr: „Það hefur skapast ákveðið tómarúm á markaði er snýr að verkefnum fyrir lítil og meðalstór fyrirtæki af stærðargráðunni 500-5.000 milljónir króna. Fyrirtækjaverkefni af þessari stærð fá ekki þá aðhlynningu sem þau eiga skilið. Við teljum okkar geta tryggt minni félögum þá faglegu meðhöndlun sem þau þurfa við fyrstu skrefin.“