Slóvenar ánægðir með nýjar evrur

Jón Aðalsteinn Bergsveinsson

skrifar

Slóvenar gengu formlega í myntbandalag Evrópusambandsins á nýársdag og varð Slóvenía 13. landið af 27 aðildarríkjum ESB til að taka upp evru sem gjaldmiðil. Slóvenía er eina landið af þeim tíu löndum sem gengu í myntbandalagið fyrir þremur árum til að taka upp evrur.

Að sögn Seðlabanka Slóveníu hefur innleiðing evrunnar gengið mjög vel fram til þessa en landsmenn hafa fram til mánudags í næstu viku til að venjast evrunni sem gjaldmiðli. Þá verða þeir að leggja tólarnum, gjaldmiðli sínum, og taka upp hinn nýja gjaldmiðil. Landsmenn eru ekki óvanir umskiptum á gjaldmiðlum því Slóvenar tóku upp tólarinn árið 1991 þegar þeir lýstu yfir sjálfstæði frá fyrrum Júgóslavíu.

Þá eru Slóvenar síður en svo ókunnir evrum því margir landsmenn fara í verslunarferðir til Ítalíu og Austurríkis, sem eru með evrur. Þá hafa stjórnvöld í Slóveníu hægt og bítandi vanið landsmenn við nýja gjaldmiðilinn allt frá mars á síðasta ári með verðlagningu vara í báðum gjaldmiðlum.

Andrej Bajuk, fjármálaráðherra Slóveníu, segir vonir standa til að umskiptin hafi jákvæð áhrif á efnahagslífið og lífskjör landsmanna. Taldi hann breytingarnar geta gengið yfir á næstu sex til tólf mánuðum.

Bajuk sagði ennfremur að innganga Slóvena í myntbandalag ESB sýndi fram á styrka efnahagsstöðu landsins miðað við hin löndin á Balkanskaganum.

Geti svo farið að Slóvenar verði fyrirmynd þeirra nágrannalanda, sem horfi til þess að taka upp evruna. Rúmenar og Búlgaría, sem gengu í ESB á síðasta ári, hafa sömuleiðis sótt um aðild að myntbandalaginu. Að sögn Bajuks þurfa stjórnvöld landanna hins vegar að taka sig á í peningamálastjórn ætli þau að uppfylla strangar kröfur myntbandalagsins og taka upp evruna sem gjaldmiðil.