Skilorðsbundið fangelsi og sekt fyrir ýmis brot

Karlmaður var í Héraðsdómi Suðurlands í dag dæmdur í fimm mánaða skilorðsbundið fangelsi og til greiðslu 300 þúsund króna í sekt fyrir þjófnað og umferðarlagabrot. Maðurinn var ákærður fyrir að ekið bíl í tvígang undir áhrifum áfengis, fyrir að hafa stolið húfu og ekið bifhjóli án hjálms og skráningarnúmera. Maðurinn játaði brot sín en hann hefur ítrekað gerst sekur um fíkniefnabrot og umferðarlagabrot. Með brotunum nú rauf hann skilorð og var refsing hans því ákvörðuð í samræmi við það. Auk skilorðsbundins fangelsis og sektar var maðurinn sviptur ökuleyfi í fjögur ár.