Seattle - St.Louis í beinni

Leikur Seattle Seahawks og St. Louis Rams verður sýndur á Sýn í kvöld og hefst útsendingin klukkan 21:50 eða beint að loknum leik Barcelona og Zaragoza í spænska boltanum. Bæði lið eru í baráttunni um sigur í NFC Vesturdeildinni og því verður væntanlega hart barist í kvöld.

Liðin mættust í 6. leikviku og þar hafði Seattle sigur í æsispennandi leik. Varaleikstjórnandinn Seneca Wallace (á myndinni) hefur leikið mjög vel fyrir Seattle að undanförnu og svo gæti farið að Shaun Alexander sneri til baka í kvöld eftir að hafa verið frá í sex vikur vegna fótbrots.

Marc Bulger, leikstjórnandi Rams, hefur sjaldan eða aldrei spilað betur en undanfarið og á að baki 2.300 yarda sendingar og hefur aðeins látið stela af sér einni sendingu. Seattle hefur unnið 5 leiki og tapað 3, en St. Louis hefur unnið 4 og tapað 4.