Þrjár milljónir múslima til Mekka

Þrjár milljónir múslima feta nú í fótspor spámannsins Múhameðs í pílagrímsferð til Mekka og í kjölfar hennar verður haldin ein stærsta hátíð múslima. Á palestínsku sjálfstjórnarsvæðunum ber þó skugga á gleðina enda hefur þar sjaldan verið jafnþröngt í búi.

Félagið Ísland-Palestína hefur brugðið á það ráð að senda neyðaraðstoð til sjálfstjórnarsvæðanna með þeim Íslendingum sem hafa lagt leið sína þangað vegna endurtekinna misbresta á því að neyðarhjálp skili sér.

Sveinn Rúnar Hauksson, formaður félagsins Ísland-Palestína, segir ástandið í Palestínu orðið afar bágt, efnahagsþvinganir Ísraela bitni harkalega á almennum borgurum og hamli hjálparstarfi á svæðinu.

Hann og dóttir hans Kristín, höfðu með sér jafnvirði 300 þúsunda króna í ferðatöskunum, til aðstoðar við Palestínumenn. Hann segir það duga skammt, mikill skortur sé á svæðinu og hátíðin verði haldin af litlum efnum.

Mikill mannfjöldi hefur engu að síður verið á götum hvarvetna í Palestínu, til að kaupa gjafir og einhvern dagamun í mat. En annar ómissandi hluti af hátíðinni sem fólk þarf að neita sér um núna eru lömbin sem siður hefur verið að fórna til að minnast þess þegar Abraham var viljugur til að fórna syni sínum.

Í Mekku biðja pílagrímarnir meðal annars fyrir velferð allra múslima, hvar sem er í heiminum. Í dag báðust þeir fyrir við Arafat-fjall, þar sem sagt er að Múhameð spámaður hafi haldið sína síðustu predikun. Á morgun hefst hin varasama grýting, þar sem 360 manns tróðust undir í janúar síðastliðnum eftir að nokkrir pílagrímar hnutu um töskur sem voru í gangveginum. Miklar varúðarráðstafanir hafa verið gerðar á pílagrímsstaðnum í Mina þar sem þessi athöfn fer fram til að reyna að koma í veg fyrir viðlíka stórslys.

Stjórnvöld í Sádi-Arabíu segjast hafa eytt meira en 70 milljörðum til að tryggja öryggi pílagrímanna, þar sem slys af þessu tagi séu tíð þegar milljónir pílagríma reyna að vinna fyrir fyrirgefningu syndanna.