Lögðu undir sig landbúnaðarráðuneytið

Loftið er lævi blandið á heimastjórnarsvæðum Palestínumanna eftir að liðsmenn Fatah-hreyfingar Mahmoud Abbas lögðu undir sig landbúnaðarráðuneyti heimastjórnarinnar í morgun.

Áhlaup Fatah kom í kjölfar árásar grímuklæddra byssumanna á æfingasvæði lífvarða Abbas í morgun en einn lét þar lífið. Abbas býr skammt frá ráðuneytinu og því segjast Fatah-menn hafa verið að tryggja öryggi hans með því að taka það yfir.

Abbas boðaði til kosninga í gær og hafa Hamas-samtökin sakað hann um að ætla með því að ræna völdum. Ríkisstjórnir á Vesturlöndum hafa hins vegar lýst yfir ánægju með ákvörðunina.