Geta útmáð kreditkortanúmer

Tæknimenn Bónuss hafa fundið leið til að útmá kreditkortanúmer viðskiptavina af kassastrimlum.

Í fréttum okkar í vikunni sögðum við frá því að kreditkortanúmer birtust í heilu lagi ásamt gildistíma korta á kassastrimlum í tuttugu og tveimur verslunum Bónuss og nokkrum minni búðum, en óvandaðir einstaklingar gætu hæglega misnotað þessar upplýsingar. Morguninn eftir að fréttin birtist fundu tæknimenn Bónuss leið til að hylja númerin.

Svanur Valgeirsson starfsmannastjóri Bónuss segir menn afskaplega ánægða með að lausnin sé fundin, enda ógaman að hafa það hangandi yfir höfði sér að óprúttnir aðilar gætu nýtt sér galla í kerfinu.