Snilldartaktar Kaka tryggðu Brössum sigur

Snillingurinn Kaka var ekki lengi að setja mark sitt á vináttuleik Brasilíumanna og Argentínumanna í London í dag, en þessi magnaði miðjumaður AC Milan kom til leiks sem varamaður í seinni hálfleik, lagði upp eitt mark og skoraði það þriðja í 3-0 sigri þeirra gulklæddu.

Miðjumaðurinn Elano skoraði fyrsta mark Brasilíumanna strax í upphafi leiks og staðan í leikhléi var 1-0 fyrir þá gulklæddu. Argentínumenn tóku öll völd í upphafi þess síðari, en eins og fyrr sagði var það Kaka sem gerði út um leikinn þegar hann kom inn sem varamaður um miðjan síðari hálfleik. Hann lagði upp annað mark Elano og annað mark Brasilíumanna á 68. mínútu. Á 90. mínútu vann hann svo boltann á eigin vallarhelmingi og brunaði sjálfur alla leið inn í teig Argentínu og skoraði framhjá markverðinum.

Leikurinn var mjög grófur í síðari hálfleik og litlir kærleikar milli leikmanna þessara erkifjenda eins og venjulega. Einnig þurfti að stöðva leikinn í nokkrar mínútur eftir að nokkrir vitgrannir áhorfendur náðu að brjóta sér leið inn á völlinn. Það breytti því ekki að leikurinn var frábær skemmtun í beinni útsendingu á Sýn.