Við spiluðum eins vel og ég þorði að vona

Jose Mourinho var mjög ánægður með frammistöðu sinna manna í Chelsea í dag eftir að liðið vann nokkuð öruggan 3-0 sigur á Manchester City. Hann segir sína menn hafa spilað eins vel og hann þorði að vona fyrir leikinn.

"Liðið er fjarri því að vera komið í toppform og svo eiga nokkrir leikmenn í meiðslum, svo ég get ekki neitað því að ég hafði nokkrar áhyggjur fyrir leikinn. Mínir menn spiluðu mjög vel frá fyrstu mínútu og í raun eins vel og ég þorði yfir höfuð að vona," sagði Jose Mourinho og bætti því við að hans menn hefðu ekki verið að senda út nein sérstök skilaboð með sigrinum.

"Allir vita að við erum með sterkt lið og því erum við ekki að senda út sérstök skilaboð með þessum sigri. Við gerum þá kröfu að vinna sigur í öllum leikjum sem við tökum þátt í," sagði Mourinho.