Allt annað að spila fyrir McClaren

Steven Gerrard hefur viðurkennt að hafa öðlast nýtt líf hjá enska landsliðinu eftir að Steve McClaren tók við liðinu af Sven-Göran Eriksson og segir að sér hafi fundist leiðinlegt að spila eftir höfði þess sænska í tíð hans með landsliðinu.

"Mér leið æðislega í leiknum gegn Grikkjum á dögunum og ég verð að segja að ég hef aldrei skemmt mér eins vel. McClaren sagði mér bara að slaka á og gera það sem ég geri best, líkt og ég geri hjá Liverpool og það var allt annað en þegar ég var að spila undir stjórn Eriksson," sagði Gerrard í samtali við Guardian.