Ísland fjölmeningarlegt land en ekki ríki

Ísland er fjölmenningarlegt land en ekki fjölmenningarlegt ríki þar sem stjórnvöld hafa ekki markað sér eiginlega fjölmenningarstefnu, segir dósent í mannfræði við Háskóla Íslands. Jafnframt sé mikilvægt að auka fé til íslenskukennslu þar sem tungumálið sé helsta hindrunin í aðlögun innflytjenda hér á landi.

ReykjavíkurAkademían hélt í dag síðasta fundinn í fundaröð sinni um málefni innflytjenda sem staðið hefur í allan vetur. Þar var velt upp þeim spurningum hvort Ísland væri fjölmenningarlegt land og hvort Íslendingar gætu lært eitthvað af reynslu annarra þjóða í innflytjendamálum. Unnur Dís Skaptadóttir, dósent í mannfræði við Háskóla Íslands, benti í erindi sínu á að Ísland væri fjölmenningarlegt land en ekki ríki. Með því eigi hún við að fólk af ólíkum uppruna búi í landinu en stjórnvöld hafi ekki sett fram fjölmenningarlega stefnu eins og Bretland, Ástralía og Svíþjóð.

Unnur segir þörf á stefnumótun í málefnum innflytjenda en nýstofnuðu innflytjendaráði hefur meðal annars verið falið að gera tillögur þar að lútandi. Þá bendir Unnur á að snar þáttur að aðlögun innflytjenda hér sé tungumálið. Þeir þurfi að taka 150 stundir í íslenskukennslu en þeim kröfum hafi ekki verið fylgt eftir með nægu fjármagni.

ReykjavíkurAkademían lætur ekki þar við sitja í málefnum innflytjenda því fyrirhugað er að stofna Miðstöð innflytjendarannsókna á hennar vegum og verður það gert innan nokkurra vikna.