Rick Adelman látinn fara

Vefsíðan Sacramento Bee í Bandaríkjunum hefur í kvöld eftir heimildarmönnum sínum að síðar í kvöld verði haldinn blaðamannafundur hjá liði Sacramento Kings þar sem þjálfara liðsins verði sagt upp störfum. Samningur hans við félagið er að renna út og verður ekki endurnýjaður ef marka má þessar nýjustu fregnir.

Adelman hefur náð ágætum árangri með liðið á þeim árum sem hann hefur verið við stjórn og undir hans leiðsögn spilaði liðið einhvern skemmtilegasta boltann í deildinni. Eftir lélega byrjun í vetur náði liðið sér vel á strik á lokasprettinum, ekki síst eftir að villingurinn Ron Artest gekk í raðir þess og margir vildu meina að samningur Adelman yrði endurnýjaður.

Orðrómur er þegar kominn á kreik um að gamla brýnið Don Nelson verði ráðinn sem eftirmaður Adelman, en hann starfar nú sem sérstakur ráðgjafi hjá Dallas Mavericks - þar sem hann var áður aðalþjálfari.