Meistararnir mörðu Sacramento

Meistarar San Antonio þurftu á öllu sínu besta að halda í nótt þegar liðið lagði Sacramento 109-98 á heimavelli sínum í fimmta leik liðanna í úrslitakeppni Vesturdeildarinnar. Bonzi Wells fór aftur á kostum í liði Sacramento og skoraði 38 stig og hirti 12 fráköst, en þrátt fyrir hetjulega baráttu komst liðið ekki í gegn um meistarana að þessu sinni. San Antonio getur nú klárað dæmið í sjötta leiknum í Sacramento.

Það hefur komið á daginn að það hentar San Antonio frekar illa að spila við Sacramento með orkuboltana Bonzi Wells og Ron Artest í fararbroddi - og varnarleikur meistaranna er alls ekki sannfærandi. Lykilmenn liðsins skiluðu þó allir fínum leik í sókninni í nótt og góð hittni þeirra gerði út um leikinn fyrir San Antonio. Manu Ginobili skoraði 27 stig og hirti 9 fráköst fyrir San Antonio, Tim Duncan skoraði 24 og Tony Parker 21 stig.

Bonzi Wells hefur verið stórkostlegur hjá Sacramento í einvíginu og í nótt skoraði hann 38 stig og hirti 12 fráköst og Ron Artest skoraði 24 stig.