Þetta var hendi

Framherjinn Didier Drogba viðurkenndi að hann hefði fengið knöttinn í höndina þegar hann skoraði annað mark Chelsea í sigrinum á Manchester City í dag, en Sylvain Distin leikmanni City var vikið af leikvelli fyrir kröftug mótmæli sín vegna atviksins.

"Þetta var mjög erfiður leikur, en þegar við náðum loks að skora fengum við meira pláss til að athafna okkur. Jú, ég fékk boltann í höndina í seinna markinu, en hvað átti ég að gera? Svona lagað kemur fyrir," sagði Drogba.

"Ég sá atvikið í leiknum og þar fannst mér þetta vera hendi. Síðan skoðaði ég atvikið aftur á myndbandi og þá sá ég líka greinilega að hann tók boltann með höndinni. Það er erfitt að lenda í svona mótlæti, en það er líklega ekkert við því að gera," sagði Stuart Pearce, stjóri Manchester City, sem var án fjölda fastamanna í leiknum vegna meiðsla.