Enskir framherjar eru eins og hnefaleikamenn

Spænski markvörðurinn Jose Reina hjá Liverpool stefnir óðfluga á að verða fyrsti markvörðurinn í sögu Liverpool til að halda hreinu í fleiri en 34 leikjum á einu keppnistímabili, en sá árangur hefur þrisvar náðst í sögu félagsins. Reina segir það hafa verið hálfgert áfall fyrir sig þegar hann kynntist hörkunni í ensku úrvalsdeildinni eftir að hafa leikið á Spáni áður.

Reina hefur ásamt félögum sínum Jerzy Dudek og Scott Carson, þegar haldið hreinu í 30 leikjum á tímabilinu, en það er besti árangur í sögu Liverpool síðan hinn skrautlegi Bruce Grobbelaar gerði það árið 1984.

"Það er ekki hægt að eigna mér allan heiðurinn að því að halda markinu hreinu, enda er það samvinna liðsins sem gerir það að verkum. Það er auðvitað allt annað að vera markvörður hjá stórliði en hjá smáliði, því oft í vetur hef ég nánast ekki haft neitt að gera. Þegar maður er markvörður stórliðs þarf maður hinsvegar að hafa einbeitinguna í 100% lagi alla leiki, því oft þarf maður kannski bara að taka á honum stóra sínum einu sinni - og þá er eins gott að verja," sagði Reyna, sem sagði viðbrigðin að koma í enska boltan líkjast meira áfalli en viðbrigðum.

"Enska úrvalsdeildin er gríðarlega hörð deild og eiginlega allt of hörð. Það er hreint ótrúlegt. Stundum eru vítateigarnir eins og hnefaleikahringir, enda eru framherjarnir í ensku úrvalsdeildinni byggðir eins og hnefaleikamenn og spila líka þannig - og þá meina ég án hanska," sagði Reina forviða.