20 manna hópur sérfræðinga skipaður

Þjóðir heimsins verða að vera betur undirbúnar ef fuglaflensan verður að faraldri að mati Alþjóðaheilbrigðisstofnunarinnar. Það gæti skipt sköpum hvað varðaði heilsufar jarðarbúa. Nú stendur til að koma á sérstökum 20-manna hópi sérfræðinga sem fylgjast munu með þróun veirunnar og smiti víða um heim. Sérfræðingar stofnunarinnar hafa sérstakar áhyggjur af H5N1-afbrigði veirunnar sem orðið hefur 78 manns að bana í heiminum á undanförnum þremur árum og hefur nú greinst í yfir 30 héröðum í Tyrklandi þar sem þrír hafa látist. Nái veiran að stökkbreytast gæti hún orðið að heimsfaraldri og orðið þúsundum að bana.