Sáttir við uppgjör

Hagnaður Landsbankans á öðrum ársfjórðungi nam 6.143 milljónum króna og hagnaðist bankinn því um 20,4 milljarða króna á fyrri hluta ársins. Afkoma bankans er tæpum einum milljarði betri en meðaltalsspár markaðsaðila gerðu ráð fyrir.

Til samanburðar hagnaðist Landsbankinn um 11,1 milljarð króna á fyrri hluta ársins í fyrra.

Nam arðsemi eigin fjár fjörutíu prósentum á ársgrundvelli á fyrstu sex mánuðum ársins.

Rétt eins og í tilfelli KB banka, sem einnig skilaði uppgjöri umfram spár, lækkuðu bréf Landsbankans eftir uppgjörið.

Sigurjón Þ. Árnason bankastjóri Landsbankans er sáttur: Hagnaðurinn á ársfjórðungnum er sá þriðji mesti í sögu bankans og kemur til á erfiðu tímabili. Það er merki um styrk bankans að ná þetta góðri niðurstöðu við aðstæður sem þessar.

Þegar horft er á tölur fyrir fjórðunginn sést mikill vöxtur í hreinum vaxtatekjum frá fyrsta árshluta. Hreinar vaxtatekjur námu tæpum 13,7 milljörðum króna samanborið við 8,9 milljarða á þeim fyrsta. Aukningin kemur að stórum hluta til vegna hárrar verðbólgu á tímabilinu. Hreinar þóknunartekjur voru um 6,9 milljarðar króna og breyttust nær ekkert milli fjórðunga. Hins vegar urðu mikil umskipti á fjárfestingatekjum bankans sem voru neikvæðar um 1,5 milljarða króna á öðrum ársfjórðungi en jákvæðar um 11,2 milljarða á þeim fyrsta. Er þetta rakið til lækkunar á hlutabréfamörkuðum.

Sigurjón er sér í lagi ánægður með vöxt vaxta- og þóknunartekna á milli ára. Á fyrstu sex mánuðunum námu þessar tekjur alls 36,4 milljörðum króna og hafa um það bil tvöfaldast á milli ára.

Rekstrarkostnaður bankans á öðrum ársfjórðungi var um 9,8 milljarðar króna og hækkaði um 1,7 milljarða frá fyrsta árshluta.

Eignir bankans stóðu í 1.811 milljörðum króna í lok júní og höfðu vaxið um 406 milljarða frá áramótum, eða um 29 prósent. Hins vegar jukust þær aðeins um 2,3 prósent á milli fjórðunga. Eigið fé bankans stóð í 123 milljörðum króna þann 30. júní og hefur eiginfjárhlutfall bankans aldrei verið hærra; nam CAD hlutfall 15,1 prósenti í lok síðasta árshluta.

Sigurjón segir núverandi staða bankans eigi að tryggja tekjur hans verði á hverju ári af stærðargráðunni sjötíu milljarðar króna og árlegur gróði á bilinu 20-30 milljarðar óháð gengishagnaði.

Á næstunni verði unnið að fjármögnunarmálum auk þess að halda áfram að vinna úr þeim yfirtökum sem ráðist var í á síðasta ári. Í vikunni gekk bankinn frá 54 milljarða króna sambankaláni til þriggja ára sem er fyrsta skref að endurfjármögnun fyrir næsta ár. Þá er stefnt að útgáfu skuldabréfa í Bandaríkjunum á seinni hluta ársins. Bankinn stefnir að því að sækja lán til almennings í Bretlandi og Hollandi með því að bjóða upp á innlánsreikninga í gegnum netið.