Mér líður vel í landi Adidas

Ofurstjarnan David Beckham hefur aldrei verið í vandræðum með að koma fyrir sig orði og í viðtali við Sky-sjónvarpsstöðina í gær, sagði hann að sér liði mjög vel í Þýskalandi af því Þýskaland væri "land Adidas."

Þýska blaðið Bild birti í gær myndir af fjölskyldu Beckham og gerði af henni létt grín og segja kunnugir að þetta hafi farið nokkuð fyrir brjóstið á landsliðsfyrirliðanum. Hann segir þó að sér líði mjög vel í Þýskalandi.

"Ég skil ekki af hverju blöðin eru að blanda fjölskyldu minni í málið. Ef menn vilja gagnrýna mig - eiga þeir að beina sjónum sínum að mér en ekki fjölskyldu minni. Ég er annars að verða vanur svona áreiti og læt það ekki á mig fá. Mér líður vel í Þýskalandi af því Þýskaland er land Adidas og fólk hérna hefur verið einstaklega vingjarnlegt," sagði Beckham, en svo geta menn spurt sig hvort það er tilviljun að Beckham skuli vera með risa styrktarsamning við Adidas.