Kínverskur blaðamaður fangelsaður fyrir njósnir

Kínverskur dómstóll dæmdi blaðamann frá Hong Kong í fimm ára fangelsi fyrir njósnir. Ching Cheong hafði verið í haldi frá því í apríl á síðasta ári. Kínverskur fréttavefur segir að hann hafi játað á sig að hafa selt Taívönum leynilegar upplýsingar frá kínverska hernum en stuðningsmenn hans segja hann saklausan.

Kínverska ríkisstjórnin herti nýverið eftirlit með fjölmiðlum og hafa tugir blaðamanna verið handteknir í kjölfarið. Fyrir utan fangelsisdóminn var blaðamaðurinn sviptur borgaralegum réttindum sínum í ár og voru allar eigur hans gerðar upptækar, hámarks refsing við njósnum í Kína er dauðadómur.