Hljómsveitin Sign spilar hér heima

Hljómsveitin Sign heldur 6 daga tónleikaröð sem hefst föstudaginn 13. október og endar föstudaginn 20. á Kerrang! kvöldi Iceland Airwaves. Hljómsveitin er nýkomin úr vel heppnuðum þriggja vikna Evróputúr þar sem þeir spiluðu 17 tónleika í 5 löndum. Sign hafa verið iðnir við tónleikahald á þessu ári og lofa að mæta þéttir til leiks með nýtt efni í farteskinu. Í tilefni af tónleikahaldinu sendir hljómsveitin frá sér smáskífuna, So Pretty, sem gefin er út í niðurhali á tonlist.is Hér er um alfarið nýja útgáfu að ræða frá því sem var á geisladisknum, Thank God for Silence, sem út kom fyrir síðustu jól. Nýja útgáfan var unnin með hinum þekkta breska hljóðupptökustjóra Chris Sheldon. Sign spila á eftirfarandi stöðum á næstunni:

Föstudagur 13. október Akranes - Fjölbrautarskólanum ásamt Jamies Star og Sýna

Laugardagur 14. október Akureyri - Sjallinn ásamt Nevolution og Jamies Star

Sunnudagur 15. október Grundarfirði - Félagsheimilinu á Grundafirði

Mánudagur 16. október Keflavík - Yello ásamt Jamies Star og Ritz

Þriðjudagur 17. október Selfoss - Fjölbrautarskólanum ásamt Jamies Star

Föstudagur 20. október Reykjavík - Nasa - Kerrang! kvöld Iceland Airwaves

Lag á Kerrang! safndiski

A Little Bit með Sign er eitt af þeim lögum sem kemur út á nýjum safndiski sem Kerrang! hefur sett saman í tilefni af 25 ára afmæli sínu og nefnist New Breed. Í frétt í Kerrang! í þessari viku segir að disknum sé ætlað að koma á framfæri heitustu hljómsveitinum í heimi Kerrang! um leið og varpað er ljósi á nýjar sveitir sem eru að brjótast í gegn og tímaritið trúi á að eigi eftir að ná miklum árangri á næstu 12 mánuðum. Í upptalningu sinni nefnir Kerrang! þrjár alþjóðlegar hljómsveitir í þessu samhengi eða Sign, frönsku sveitina Gojira (sem einnig koma fram á Kerrang! kvöldi Iceland Airwaves) og áströlsku sveitina The Scare sem Sign ferðuðust með á Kerrang! Most wanted túr fyrr á árinu. Egill Rafnsson trommuleikari hljómsveitarinnar segir þetta viðurkenningu fyrir Sign. "Við erum búnir að lesa þetta tímarit frá því að við vorum púkar og það er góð tilfinning að sjá Sign á prenti í Kerrang!. Þeir hafa stutt ótrúlega vel við bakið á okkur síðan að við spiluðum á Iceland Airwaves í fyrra og beiðni þeirra um að fá lag á safndisk sem gefinn er út í tilefni af afmælisári þeirra toppaði þann stuðning."