Campbell til Portsmouth

Portsmouth tilkynnti það í gær að varnarmaðurinn Sol Campbell væri orðinn leikmaður félagsins. Þessi 31 árs enski landsliðsmaður fékk samningi sínum við Arsenal rift í júlí og mun samningur hans við Portsmouth vera til tveggja ára. Arsene Wenger, stjóri Arsenal, segir þessar fréttir koma sér á óvart því upphaflega hafi Campbell beðið um að losna frá samningi sínum til að spila utan Englands.

Campbell lék 197 leiki fyrir Arsenal og vann fimm stóra titla eftir að hafa komið til félagsins frá Tottenham árið 2001. Harry Redknapp, stjóri Portsmouth, er ekki hættur að reyna að styrkja leikmannahóp sinn en hann beinir nú sjónum sínum að Sylvain Distin hjá Manchester City eða Ryan Nelsen hjá Blackburn.