Sumarleg sönglög í kvöld

Auður Gunnarsdóttir sópransöngkona og Andrej Hovrin píanóleikari flytja sönglög eftir Alban Berg, Jean Sibelius, Edvard Grieg og Sergei Rachmaninoff á sumartónleikum Listasafns Sigurjóns í kvöld.

Auður Gunnarsdóttir stundaði nám í Söng­skólanum í Reykjavík undir handleiðslu Ólafar Kolbrúnar Harðardóttur og framhaldsnám í tónlistarháskólanum í Stuttgart en hún hefur komið fram í ótal óperuhúsum í Þýskalandi, meðal annars sungið hlutverk Pamínu í Töfra­flautunni og Donnu Elviru í Don Giovanni en hér heima hefur hún sungið hlutverk Mimiar í La Bohéme og Greifynjunnar í Brúðkaupi Fígaró hjá Íslensku óperunni. Árið 1999 kom út geisladiskurinn Íslenskir söngvar þar sem Jónas Ingimundarson leikur með henni á píanó.

Andrej Hovrin er af rússnesku bergi brotinn og nam píanóleik við tónlistarskólann í Samara en hann hélt síðar til framhaldsnáms í Stuttgart í Þýskandi þar sem hann sérhæfði sig í flutningi ljóðasöngs. Andrej hefur komið víða fram sem einleikari og kammermúsík- og ljóðapíanóleikari, t.d. í Svíþjóð, Þýskalandi, Grikklandi og á Ítalíu

Tónleikarnir hefjast kl. 20.30.