Myndar sérstakt samband með Ronaldinho

Landsliðsfyrirliðinn Eiður Smári Guðjohnsen skoraði eina mark Barcelona í 1-1 jafnteflisleik gegn Guadalajara í æfingaferð spænska félagsins um Bandaríkin em nú stendur yfir. Eiður skoraði þar sitt annað mark í jafn mörgum leikjum en bæði komu eftir undirbúning Brasilíumannsins Ronaldinho og virðast þeir félagar vera að finna sig vel saman.

"Ronaldinho er leikmaður sem lætur allt liðið spila betur. Þú þarft bara að hreyfa þig vel og á réttan hátt, þá máttu búast við því að fá boltann frá honum. Það er alls ekki erfitt að spila með Ronaldinho. Það er mjög ánægjulegt að ná að skora þar sem ég er framherji og stuðningsmennirnir búast við því að sjá mörk frá mér," sagði Eiður Smári eftir leikinn.

Ronaldinho svaraði svo í sama streng. "Eiður er mjög útsjónarsamur leikmaður og staðsetur sig mjög vel. Mér finnst frábært að spila með honum. Ég þekki hann ekki mjög vel enn sem komið er en við þekkjum hreyfingar og hugsanir hvors annars á augnarráðinu einu saman nú þegar. Þetta er fullkomin byrjun fyrir okkur," sagði Ronaldinho um Eið Smára Guðjohnsen en spænska deildin hefst þann 27. ágúst.